«Атамекен» ҰКП және «Bilim Invest» Қауымдастығы мектепке дейінгі білім беру ұйымдарын лицензиялау мәселесін талқылады
Астанада «Атамекен» Ұлттық кәсіпкерлер палатасы алаңында «Bilim Invest» Ұлттық білім беру инвесторлары қауымдастығы өкілдерімен кездесу өтті. Жиын мектептегі білім беру ұйымдарын болашақта лицензиялау критерийлерін талқылауға арналды. Кездесуге Оқу-ағарту министрлігінің, өңірлік палаталардың өкілдері және саланың негізгі мамандары қатысты. Диалог алдағы жылдары күтілетін елеулі өзгерістерге дайындық мақсатында өткізілген консультациялар тізбегінің мазмұнды жалғасы болды.
«Bilim Invest» қауымдастығының президенті Күләнда Батырбекова лицензиялау мәселесіне жеке инвесторлар мен білім беру ұйымдары иелерінің қызығушылығы жоғары екенін атап өтті. Оның айтуынша, талаптардың ашықтығын қамтамасыз ету және мектепке дейінгі білім беру ұйымдарына артық жүктемесіз бейімделуге мүмкіндік беретін өтпелі кезеңдік мерзімді қарастыру маңызды.
Оқу-ағарту министрлігінің өкілдері бүгінде лицензиялау бойынша бірізді талаптарды әзірлеу жұмысы аяқталуға жақын екенін мәлімдеді. Бұл талаптар нарықтағы барлық қатысушылар үшін бірдей ережелерді қамтамасыз етуге бағытталғаны атап өтілді. Лицензиялау тек мемлекеттік бақылау құралы ретінде ғана емес, сонымен қатар білім беру қызметтерінің сапасын арттыру және балалардың қауіпсіздігін қамтамасыз ету механизмі ретінде де қарастырылады.
Білім саласында сапаны қамтамасыз ету комитетінің төрағасы 2027 жылдан бастап қолданысқа енетін критерийлер туралы жаңартылған ақпарат ұсынды. Ол өтпелі кезең 2027 жылдан бастап 2029 жылға дейін біртіндеп жүргізілетінін еске салды. Талаптарға кадрлық қамтамасыз ету, материалдық-техникалық база, санитарлық нормалар, білім беру бағдарламалары және қосымша қауіпсіздік шаралары кіреді.
Кездесуге қатысушылар балабақшаларды жаңа стандарттармен жұмыс істеуге ерте дайындаудың маңыздылығын атап өтті. Лицензиялау сәтті өтуі үшін әдістемелік қолдау, түсіндіру семинарларын өткізу және ұйымдардың ағымдағы жағдайын бағалау қажет. Осыған байланысты жеке балабақшаларға алдын ала ішкі аудит жүргізіп, болашақ талаптарға қаншалықты сәйкес келетінін анықтау ұсынылды.
Талқылау қорытындысы бойынша, «Атамекен» ҰКП және «Bilim Invest» қауымдастығы бірлескен жұмысын жалғастыруға келісті және мемлекет, бизнес және кәсіби қауымдастық арасында тұрақты диалог жүргізудің маңыздылығын атап өтті.
Лицензиялауды 2029 жылға дейін кезең-кезеңімен енгізу саланы жаңа стандарттарға бейімдеуді жеңілдетіп, балабақшалардың қызмет сапасын арттырады, сондай-ақ ата-аналардың сенімін нығайтып, Қазақстандағы мектепке дейінгі білім беру ұйымдарының білімін модернизациялауда маңызды қадам болмақ.
Пікір қалдыру:
Пікірлер: